بَحَــــر ثــــالِث

غمضوا عيونكم وتخيلوا، مكان أبيض فيه موج وشطآن، وفيه ناس واجد اسمهم شعب، وأرض خضرة اسمها أوطان،

 وكان فوقها بحر، وتحتها بحر فقالوا بنسميها «بحران»، جت موجة على كفّ الريح مِثل الريح، مشتتة، مرتبكة، وبكلّ المزن صارت «بحر ثالث» مالح وغضبان، حرّف في القواميس وشتّت التحام الضلوع وقَلَب كفتيّ الميزان، وكان فيه نورس غلبان، يطير ويغني للناس: كان يا ماكان!
البحرين؟.. عفوًا النمرة غلط!

صباح العذوبة..
صباح الملح،
صباح التناقضات يا بلادي..
صباحك بحر مدفون، وعين ناضبة، وحرامي قانونيّ
صباحك خير، بقدر ما نامت عيونك، وظلت تدوّر على النوم عيني،
وظلّت تراقب عجايب هالزمن، كأنّ هالبحر يقول:
 أنا الشي اللي يخلي كل شي حي.. تدفنوني؟
أنا أبو الخيرات أبو الأسماك، أبو اللؤلؤ المنثور، أنا البحرين فيكم.. تغيبوني؟
انزين.. والأحياء اللي في جوفي من سمك ولؤلؤ، كلها تصرخ: ليش ليش تخنقوني؟
عشان أرض مو من حقكم؟ عشان تزوير؟ عشان سرقات؟ عشان شنو خبروني؟
أنا مو عارف.. وللحين مو داري، هالكروش اللي مليانة ذهب متى بتشبع؟ فهموني!
حرام اللي يذر الرمل في قلبي، يخنقني، وعلى اللي يرميه في عيوني!
ترا للحين أبو الخير مثل ما كان، والأطفال كلها تغنيني!

إذا جه عيد الأضحى، وين يروحون، وين يرمون الضحية، هي تسأل: في طشت يرموني؟
ماهو هذا الرماد اللي تجوفونه شكلي، ولا هالحجارة، أنا أزرق مثل صفا السما لوني!
وعقب ما ضيعتوني من يد هالشعب البريء وطمستوني قولوا لي يا أصحاب السيادة وين وين بتلقوني؟
بنلقاك يابحرنا.. بنلقاك، لو نضطرّ نخلقك من دموعنا، لو نعطيك عيونّا، تعصر مايها حتى لو صوتنا، ترا لا يغرّك سكوتنا.. زين؟ يا أغلى بحورنا؟
«صوت المواطن هو الرصاصة التي تغتال السكوت»

يتبع بِـ عُمر